ABŞ-də robot müəllim dərs keçəcək
ABŞ-də ilk dəfə humanoid robot məktəbdə dərs prosesinə cəlb olunacaq. Sally adlı robot 1 sentyabrdan etibarən Nyu-York ştatının Salamanka şəhərində yerləşən məktəblərdən birində müəllimlərə və şagirdlərə kömək edəcək.
Ajans.az xəbər verir ki, robot Woz Ed təhsil proqramı çərçivəsində, Apple şirkətinin həmtəsisçisi Stiv Voznyakın dəstəyi ilə həyata keçirilən layihənin bir hissəsidir. Sally 11 və 12-ci sinif şagirdlərinə proqramlaşdırma, robototexnika və süni intellekt üzrə dərslərdə dəstək göstərəcək.
Humanoid robot qadın görünüşünə malikdir – qəhvəyi saçları, silikon dərisi, hərəkətli qolları var və ABŞ-ın həmin bölgəsinə uyğun aksentlə danışa bilir. Bununla belə, Sally müstəqil şəkildə hərəkət edə bilmir.
Robotun hazırlanmasına təxminən 60 min ABŞ dolları xərclənib.
Məktəbin direktoru Mark Beelerin sözlərinə görə, bu təşəbbüs təhsildə yeni mərhələnin başlanğıcı hesab olunur. O vurğulayıb ki, Sally müəllimləri əvəz etməyəcək. Robotun əsas vəzifəsi şagirdlərə istiqamət vermək, onları düşünməyə təşviq etmək və problemlərin həllini müstəqil tapmalarına kömək etməkdir.
Digər Xəbərlər
