Bu ölkədə zavodda dəhşətli yanğın: ÖLƏNLƏR VAR

Şri-Lankanın Qərb əyalətində təhlükəsizlik dəbilqələri istehsal edən zavodda baş verən güclü yanğın nəticəsində azı 5 nəfər həlak olub.

Ajans.az xəbər verir ki, bu barədə Daily Mirror qəzeti məlumat yayıb.

Məlumata görə, yanğın paytaxt Kolombodan təxminən 24 kilometr cənub-şərqdə, Homaqama şəhərində yerləşən sənaye zonasında qeydə alınıb.

Hadisə zamanı zavod binasında 80-dən çox işçi olub. Yanğının söndürülməsinə 10-a yaxın yanğınsöndürmə briqadası cəlb edilib və alovun yayılmasının qarşısı alınıb.

Hazırda xilasetmə qrupları binada axtarış əməliyyatlarını davam etdirir. Rəsmilər dağıntılar altında insanların qala biləcəyini istisna etmirlər.

Yanğının başvermə səbəbi araşdırılır.