Qurban Qurbanovdan istefası barədə xəbərlərə REAKSİYA
"Oyuna pis hazırlaşmamışdıq. İlk hissədə yaxşı mübarizə apardıq".
Ajans.az xəbər verir ki, bu sözləri "Qarabağ"ın baş məşqçisi Qurban Qurbanov UEFA Avropa Liqasının əsas mərhələsində Bakıda Niderlandın "Ayaks" klubuna məğlub olduqları III tur oyunundan sonra təşkil olunan mətbuat konfransında deyib.
O, Julio Romao və Elvin Cəfərquliyevin qırmızı vərəqə aldıqlarına görə məyus olduğunu bildirib: "Təəssüf ki, onlar növbəti matçda bizə kömək edə bilməyəcəklər. Futbolçularıma möhtəşəm xarakter göstərdiklərinə görə təşəkkür edirəm. Bu, bizim inkişafa doğru addımlamağımızın sübutudur. Doqquz nəfərlə qalsaq da, azarkeşlər sonadək dəstək oldular. Elvinin qırmızı vərəqə almasına gəlincə, onun da səhvi oldu. Bu barədə söhbətim olacaq. Əgər komanda məğlub olursa, ikinci qırmızı vərəqə verməyin mənası yox idi. Romaonun epizodunda isə əvvəlcə rəqibin futbolçusu ona qarşı kobudluq etmişdi. Lakin hakim düzgün qərar vermədi. Heç vaxt hakimlərın üstünə getməmişəm, ancaq bəsit qərarlar olmamalıdır".
Mütəxəssis noyabrın 7-də Norveçdə "Bodo Qlimt"ə qarşı keçirəcəkləri oyun barədə də danışıb: "Heç kim narahat olmasın. Qələbə üçün Norveçə gedəcəyik. Düşünürəm ki, böyük problemimiz yoxdur. Güclü komandalara qarşı oynamışıq. Bu, Azərbaycan futbolu adına müsbət məqamdır".
53 yaşlı çalışırdıcı Bəhlul Mustafazadənin bugünkü matça start heyətdə başlamamasına münasibət bildirib: "Mənə görə, Kevin Medina və Bədavi Hüseynov əsas heyətdə oynamağa layiq idi".
Qurban Qurbanov "Sizin istefanızla bağlı paylaşımlar olur. Bu barədə nə deyə bilərsiz? Məşhurlar da sizin getməli olduğunuzu deyirlər" sualına isə belə cavab verib:
"Bilmirəm ki, onlara nə deyim, sözüm yoxdur. Mən istənilən sahədə uğurlu olan azərbaycanlını dəstəkləyirəm. Sosial şəbəkələrdən də buna görə uzağam ki, nəsə yanlış olar".
Qeyd edək ki, “Qarabağ” Avropa Liqasında növbəti oyununu noyabrın 7-də Norveçdə "Bodo Qlimt"ə qarşı keçirəcək.
