Yanacaq böhranı Putinin reytinqinə zərbə vurdu
Rusiyada dərinləşən yanacaq böhranı fonunda Prezident Vladimir Putinin reytinqi Ukraynada müharibənin başlanmasından bəri ən aşağı səviyyəyə enib.
Ajans.az xəbər verir ki, bu barədə The Moscow Times qəzeti Ümumrusiya İctimai Rəyin Öyrənilməsi Mərkəzinin (VTsIOM) məlumatlarına istinadən xəbər yayıb.
Məlumata görə, iyulun 12-nə olan göstəriciyə əsasən, Putinin fəaliyyətini dəstəkləyənlərin payı 65,1 faizə düşüb. Bu, müharibə dövründə qeydə alınan ən aşağı göstərici hesab olunur.
Son bir həftə ərzində reytinq 0,9 faiz bəndi, son dörd həftədə isə ümumilikdə 5,3 faiz bəndi azalıb.
Qeyd olunur ki, bu azalma tempi Kremlin 2022-ci ilin payızında qismən səfərbərlik elan etdiyi dövrdə və 2024-cü ilin avqustunda Ukrayna Silahlı Qüvvələrinin Kursk vilayətinə daxil olduğu vaxt müşahidə edilən geriləməni də üstələyib.
VTsIOM-un məlumatına əsasən, Putinin fəaliyyətini bəyənməyənlərin payı 23,4 faizə yüksəlib. Bu göstərici hökumətin fəaliyyətini bəyənməyənlərin səviyyəsinə (24,4 faiz) yaxınlaşıb. Eyni zamanda, Putinə qarşı narazılıq Baş nazir Mixail Mişustinin göstəricisindən 1,5 dəfədən çoxdur.
Digər Xəbərlər
