Türkiyədə nə baş verir? - "Dövlət addımlar atmalıdır"
"Türkiyədə siyasi proseslər həmişə dinamik xarakterli olub. Elə bir ölkədir ki, insanlar siyasətlə yaxından maraqlanırlar, siyasət daim gündəmdə duran məsələlərdən biridir".
Bunu Ajans.az-a açıqlamasında politoloq Sultan Zahidov deyib. O qeyd edib ki, hazırki proseslər Türkiyədə ciddi təlatümlər baş verdiyini göstərir:
"Ölkə bir tərəfdən xarici siyasətdə mövqelərini kifayət qədər qüvvətləndirsə də, daxildə problemlər yaranmaqdadır. Bu da ölkənin daha çox xarici siyasətə fokuslanmasına əngəl olur. Kütləvi mitinqlər baş verir, tələbələr etirazlar bildirirlər. Düşünmürəm ki, Türkiyədə hansısa fundamental dəyişikliklər baş verə bilər, amma bu proseslər onu göstərir ki, müəyyən narazılıqlar var və bu narazılıqları aradan qaldırmaq üçün dövlət addımlar atmalıdır. Mitinqlər göstərir ki, Türkiyə artıq daxilində müxalifətin artan təsirini nəzərə almaq durumundadır".
Xatırladaq ki, martın 19-da İstanbul meri Əkrəm İmamoğlunun saxlanılmasından sonra Türkiyədə genişmiqyaslı aksiyalar başlayıb və davam etməkdədir.
