İspaniya Baş nazirinin qardaşına 9 illik QADAĞA

İspaniyada məhkəmə Baş nazir Pedro Sançesin qardaşı David Sançesi vəzifə səlahiyyətlərindən sui-istifadə işi üzrə təqsirli bilərək 9 il müddətinə dövlət vəzifəsi tutmaq hüququndan məhrum edib.

Ajans.az xəbər verir ki, bu barədə Ekstremadura Ali Məhkəməsinə istinadən TASS agentliyi məlumat yayıb.

Məlumata görə, iş üzrə məhkəmə prosesi 28 may – 9 iyun tarixləri arasında keçirilib. Dinləmələr zamanı 40-dan çox şahid və 11 təqsirləndirilən şəxs ifadə verib.

Məhkəmənin qərarına əsasən, David Sançes Badaxos Vilayət Şurasında vəzifəyə təyin olunması ilə bağlı vəzifə səlahiyyətlərindən sui-istifadə etməkdə təqsirli bilinib və 9 il müddətinə dövlət vəzifəsi tutmaq hüququndan məhrum edilib. Qərardan apellyasiya şikayəti verilə bilər.

İstintaq 2024-cü ildə Badaxos Vilayət Şurasında aparılan axtarışlardan sonra başlanıb. Araşdırma çərçivəsində David Sançesin işə qəbulu ilə bağlı sənədlər götürülüb.

İddia "Təmiz Əllər" (Manos Limpias) təşkilatı tərəfindən qaldırılıb. İttihama görə, Badaxos Vilayət Şurası David Sançes üçün xüsusi vəzifə yaradıb və sonradan həmin vəzifənin şərtlərini onun peşəkar və şəxsi maraqlarına uyğun şəkildə dəyişdirib.

Qeyd edək ki, David Sançes 2017-ci ildə Badaxos Vilayət Şurasında işə başlayıb və konservatoriyalar, daha sonra isə ifaçılıq sənəti şöbəsinin fəaliyyətinin əlaqələndirilməsi ilə məşğul olub. Pedro Sançes isə 2018-ci ildə İspaniyanın Baş naziri vəzifəsinə gəlib.