Trampdan YENİLİK: Bu tarifləri DƏYİŞDİ
ABŞ yarımkeçiricilər və əczaçılıq məhsullarının idxalına tariflər tətbiq edəcək.
Ajans.az xəbər verir ki, yeni tədbirləri ölkə prezidenti Donald Tramp elan edib.
Nümayəndələr Palatasının hakim Respublika Partiyasının fraksiyasına danışan Amerika prezidenti tariflərə ehtiyacı zavodların ABŞ-yə qaytarılması ilə izah edib. Onun sözlərinə görə, 98-ə yaxın çip istehsalçısı Tayvana köçüb və o, onları geri qaytarmaq üçün hər şeyi edəcəyinə söz verib.
“Yaxın gələcəkdə biz bu kritik məhsulların istehsalını ABŞ-yə qaytarmaq üçün xaricdə istehsal olunan kompüter çipləri, yarımkeçiricilər və əczaçılıq məhsullarına tariflər tətbiq edəcəyik”, - deyə Tramp bildirib.
Gələcəkdə yeni prezidentin administrasiyası polad və bir sıra digər malların idxalına da rüsum tətbiq etmək niyyətindədir.
Tramp artıq ABŞ-nin BRİKS ölkələri ilə ticarət əlaqələrini əhəmiyyətli dərəcədə çətinləşdirəcəyini və bu ölkələrdə istehsal olunan məhsullara 100 faizədək böyük tariflər tətbiq edəcəyini vəd edib. O, həmçinin Aİ ABŞ-dən neft və qaz alışını artırmasa, Avropadan bütün idxallara ən azı on faizlik daimi tariflərlə hədələyib.
Digər ölkələrin məhsullarına rüsum məsələsi ABŞ-nin yeni prezidenti Donald Trampın komandasında ilk fikir ayrılıqlarına səbəb olub. Tariflər yaxın bir neçə ay ərzində tətbiq ediləcək. Qeyri-müəyyənlik ondan ibarətdir ki, Tramp bu məsələni iki düşərgə ilə müzakirə edir: inflyasiyanın artmasının qarşısını almaq üçün mərhələli və məqsədyönlü məhdudiyyətlərə üstünlük verən siyasətçilər və iri miqyaslı tariflərə səs verənlər.
