Tarixi "Notr Dam" kilsəsi 5 illik təmirdən sonra - FOTOLAR
Parisin tarixi "Notr Dam" kilsəsi təmirdən sonra qapılarını ziyarətçilərin üzünə açıb.
Ajans.az xəbər verir ki, kilsənin açılışı münasibətilə tədbir təşkil olunub.
Tədbirdə Fransa prezidenti Emmanuel Makron, ABŞ-ın yeni seçilmiş prezidenti Donald Tramp, Almaniya prezidenti Frank-Valter Ştaynmayer, Britaniya şahzadəsi Uilyam, milyarder İlon Mask, İtaliyanın baş naziri Giorgia Meloni, Ukrayna prezidenti Volodimir Zelenski və digər siyasətçilər iştirak ediblər.
Mərasim rəsmi olaraq Notr-Dam kilsəsinin zənglərinin çalınması ilə başlayıb. Katedralin qapılarını arxiyepiskop Laurent Ulriç açıb.
Xatırladaq ki 2019-cu il aprelin 15-də Parisdəki Notr-Dam kilsəsində güclü yanğın baş verib. 12 saat ərzində yanğını idarə etmək mümkün olmayıb. Nəticədə kafedrala ciddi ziyan dəyib.
Prokurorluğun məlumatına görə, yanğına elektrik cərəyanındakı nasazlıq və ya söndürülməmiş siqaret səbəb ola bilər. Noyabrın əvvəlində yanğından sonra ilk dəfə zənglər yenidən çalmağa başlayıb.
