Dexter serialın fanatı iki nəfəri ÖLDÜRÜB

Ajans.az xarici mediaya istinadən xəbər verir ki, 40 yaşlı Ceyms Desboro iki tanışını öldürməkdə, onların cəsədlərini hissələrə ayırmaqda, qalıqları gizlətməyə cəhd etməkdə və daha sonra qurbanların pullarından istifadə etməkdə ittiham olunur.

Vinçester Tac Məhkəməsində keçirilən dinləmələr zamanı bildirilib ki, müstəntiqlər Kornuolldakı Paramur meşəsində aparılan axtarışlar zamanı 1900-dən çox kömürləşmiş sümük fraqmenti aşkar ediblər. DNT ekspertizası həmin qalıqların 57 yaşlı Klaudio Aquilinoya məxsus olduğunu təsdiqləyib.

Sonrakı axtarışlar zamanı polis ikinci ehtimal olunan qurban — 43 yaşlı Daniel Kolmanın parçalanmış qalıqlarının basdırıldığı dayaz məzar da aşkar edib. Prokuror Əhməd Hüseynin sözlərinə görə, məzarda kişinin bədən hissələri, ayaqları və pəncələri tapılıb.

İttiham tərəfi Desboronun ifadəsinə də diqqət çəkib. Bildirilib ki, o, məhkəmə-tibbi ekspertiza əməkdaşı ilə söhbəti zamanı "Dexter" serialını, xüsusilə də cəsədlərin parçalanması ilə bağlı səhnələri bəyəndiyini etiraf edib. Prokurorluq vurğulayıb ki, seriala maraq özü-özlüyündə cinayət sübutu olmasa da, bu faktın iki parçalanmış cəsədin tapılması ilə üst-üstə düşməsi istintaq üçün əhəmiyyət daşıyır.

İstintaqın versiyasına görə, hər iki qurban Desboro ilə eyni evdə yaşayırdı və sonuncu dəfə onun yanında görüblər. Prokurorluq hesab edir ki, onların itkin düşməsindən sonra bank hesablarından pul çıxarılıb və vəsaitlərdən istifadə olunub. İddialara görə, bu əməliyyatlar Desboro tərəfindən həyata keçirilib.

İttiham tərəfi onun hər iki şəxsi öldürdüyünü, cəsədləri parçaladığını, qalıqları yandıraraq və gizlədərək cinayətin izlərini ört-basdır etməyə çalışdığını, daha sonra isə qurbanların vəsaitlərindən istifadə etdiyini bildirir.

Ceyms Desboro irəli sürülən bütün ittihamları rədd edir. Məhkəmə araşdırmaları davam edir.