Bu gün Gürcüstan prezidentinin andiçmə MƏRASİMİ OLACAQ
İnauqurasiyadan sonra Gürcüstanın seçilmiş prezidenti Mixeil Kavelaşvili hazırkı prezident Salome Zurabişvilinin buna qarşı çıxmasına baxmayaraq, Orbeliani meydanında yerləşən prezident sarayında işə başlayacaq.
Ajans.az xəbər verir ki, bu barədə brifinqdə Gürcüstan parlamentinin spikeri Şalva Papuaşvili bildirib.
“Əlbəttə, Orbeliani meydanında Kavelaşvili işə başlayacaq. Zurabişvili bu binaya varis olmayıb. O, gürcü xalqına və onun prezidentinə məxsusdur. Bu gün and içdikdən sonra xanım Salome Zurabişvili artıq Gürcüstanın prezidenti olmayacaq. Gürcüstanın prezidenti Mixail Kavelaşvili olacaq”, - Gürcüstan parlamentinin spikeri inauqurasiyadan sonra seçilmiş prezidentin harada işləyəcəyi ilə bağlı suala cavab verib.
RİA Novosti-nin məlumatına görə, Zurabişvilinin çağırışı ilə iki minə yaxın insan Obrelianinin prezident sarayına gəlib. Onlar şüarlar səsləndirir, bayraqlar tuturlar. Zurabişvilinin jurnalistlərə açıqlama verəcəyi gözlənilir və bu bəyanat bütün iştirakçılara yayımlanacaq.
Gürcüstanın altıncı prezidenti Mixeil Kavelaşvilinin andiçmə mərasimi bazar günü, dekabrın 29-da keçiriləcək. Kavelaşvilinin andiçmə mərasimi parlament binasında baş tutacaq və 40 dəqiqə davam edəcək.
Bundan əvvəl Gürcüstan prezidenti Salome Zurabişvili demişdi ki, onun varisi Mixail Kavelaşvilinin andiçmə mərasimi ərəfəsində o, iqamətgahda gecələyəcək.
Dekabrın 23-də Zurabişvili müxalifət nümayəndələri ilə görüşdən sonra ölkədə yeni seçkilərə hazırlıq barədə məlumat verib. O, həmçinin dekabrın 29-da səlahiyyət müddəti bitdikdən sonra bu vəzifədə qalacağını əlavə edib.
