Bakının mərkəzi küçəsində səkilər zəbt olundu - RƏSMİ AÇIQLAMA
Xəbər verdiyimiz kimi, Bakının Afiyəddin Cəlilov küçəsində səkilər zəbt olunub. Ərazidə yaşayan sakinlər məcburiyyətdən maşın yoluna çıxdıqlarını bildirirlər.
Ajans.az xəbər verir ki, məsələ ilə bağlı Xətai Rayon İcra Hakimiyyətindən “Qafqazinfo”ya ərazinin qurumun nəzarətində olduğu açıqlanıb.
“Ərazi rayon İcra hakimiyyəti olaraq nəzarətimizdədir. Hazırda orada səkinin bərpası işləri gedir. Sonra isə rayonun digər prospekt və küçələrində olduğu kimi, yaşıllıq zolağı yaradılacaq. Ərazidə heç bir ağac kəsintisindən söhbət gedə bilməz.
Çünki orada ağac olmayıb. Əksinə şəkillərdən də göründüyü kimi parklanma yeri kimi istifadə olunub. Hazırda isə qeyd olunduğu kimi müasir norma və qaydalara uyğun olaraq səki və yaşıllıq zolağı yaradılır”, - rəsmi açıqlamada vurğulanıb.
***
Bakının Afiyəddin Cəlilov küçəsində səkilər zəbt olunub.
Ajans.az Baku TV-yə istinadən xəbər verir ki, ərazidə yaşayan sakinlər deyirlər ki, əvvəllər burada ağaclar var idi. Amma indi səki ilə yanaşı, ağaclar da ləğv olunub.
Sakinlər məcburiyyətdən maşın yoluna çıxdıqlarını bildiriblər: “Səki yoxdur, məcburən maşın yoluna çıxırıq. Onda da təhlükə ilə üzləşirik”.
Ərazidə çalışan ustalar isə deyir ki, piyada səkisi yenidən bərpa olunacaq.
Məsələ ilə bağlı Dövlət Şəhərsalma və Arxitektura Komitəsindən bildirilib ki, Bakı Şəhər Memarlıq və Şəhərsalma Baş İdarəsi tərəfindən 10 yanvar 2025-ci il tarixində sözügedən əraziyə baxış keçirilib:
“Ərazidə səkinin zəbt edilərək avtomobil dayanacağına çevrilməsi faktı aşkarlanıb. Parklanma yerinin yaradılması qanunvericiliklə müəyyən edilən qaydada razılaşdırılmayıb. Baş İdarə tərəfindən işlər dayandırılaraq səkinin bərpası və ictimai ərazinin vətəndaşların istifadəsinə qaytarılması ilə əlaqədar aidiyyəti orqanlara müraciət ünvanlanıb, müvafiq göstərişlər verilib”.