Teslanın yeni ROBOTLARI: Yemək bişirir, evi təmizləyir... - DETALLAR/QİYMƏT
Tesla korporasiyası Optimus robotunun detallarını açıqlayıb.
Ajans.az xəbər verir ki, şirkət bunu "YouTube"da mövcud olan “Us, Robot” təqdimatı zamanı qeyd edib. Korporasiyanın rəhbəri İlon Maskın sözlərinə görə, onların Tesla Optimus robotları tezliklə yenilənmə alacaq, bunun sayəsində onlar müxtəlif mürəkkəb tapşırıqları yerinə yetirə biləcək. Maskın sözlərinə görə, humanoidlər evi təmizləmək, iti gəzdirmək, uşaqlarla oynamaq və s.kimi gündəlik prosesləri icra edəcək. Robotun qiyməti 20-30 min dollar təşkil edəcək. İlon Mask qeyd edib ki, insanabənzər robotlar çox güman ki, avtomobildən də ucuz olacaq və hər kəs onu ala bilər.
İyun ayında investorlar üçün keçirilən görüşdə Tesla robotların 10-20 min dollara başa gələcəyini bildirib. Mask Optimus robotlarını Tesla tarixinin ən iddialı məhsulu adlandırıb. Onun fikrincə, robotların yayılması ilə insanlar “bolluq əsrində” yaşamağa başlayacaqlar. “The Verge” jurnalının jurnalistləri qeyd edib ki, təqdimatdan sonra robotlar tamaşaçıların qarşısına çıxıb. Belə ki, maşınlar jestlərlə insanlarla ünsiyyət qurur, onlara kokteyllər təklif edirdilər. Media müəllifləri robotların müstəqil hərəkət etdiyini və ya operator tərəfindən idarə olunduğunu dəqiq deyə bilməyib. “Us, Robot” təqdimatı zamanı Tesla pilotsuz taksi və özü idarə olunan mikroavtobus təqdim edib. Yeni elektromobillərin pedalı və sükanı olmayacaq və 2026-cı ildə satışa çıxacaq.
