Tanınmış bloger evində GÜLLƏLƏNDİ

Braziliyanın Minas Gerais ştatının Mutum bələdiyyəsində tanınmış blogger Alzira Maria Teodoro Luis öz evində güllələnərək öldürülmüş vəziyyətdə tapılıb.

Ajans.az xarici mediaya istinadən xəbər verir ki, 43 yaşlı qadının cəsədi ötən bazar günü səhər saat 09:00 radələrində polis tərəfindən aşkar edilib. O, kənd təsərrüfatı mövzusunda bloq aparırdı və Instagram və TikTok platformalarında 77 mindən çox izləyiciyə sahib idi.

Hərbi polisin məlumatına görə, hücum edən şəxslər motosikletlə evin qarşısına gələrək atəş açıblar. Şahidlərin bildirdiyinə görə, blogger son ana qədər qaçmağa çalışıb.

Məlumata əsasən, Alzira Maria Teodoro Luis hücum zamanı evin eyvanında olub və açılan atəşlərdən biri divara dəyib. Daha sonra o, evin arxa hissəsinə qaçaraq xilas olmağa çalışsa da, orada başından aldığı güllə yarası nəticəsində həyatını itirib.

Qonşular müstəntiqlərə üç-dörd atəş səsi eşitdiklərini bildiriblər. Hadisə yerində aparılan baxış zamanı iki 9 mm-lik patron gilizi, güllə qalıqları, mərhumun mobil telefonu və qonaq otağında pnevmatik tüfəng aşkar edilib.

Cinayəti törədən şəxslər hadisə yerindən motosikletlə uzaqlaşıblar. Onların istiqamətinin qonşu Aimores şəhəri olduğu bildirilir, lakin nömrə nişanı müəyyən edilməyib.

Minas Gerais Mülki Polisi hadisə ilə bağlı genişmiqyaslı qətl istintaqı başladıb. Hazırda cinayətin motivləri müəyyən edilməyib.

Qeyd olunur ki, blogger ölümündən bir neçə saat əvvəl sosial şəbəkələrdə evinin eyvanında çəkilmiş son videosunu paylaşmışdı.