Britaniya Məscid təhlükəsizliyinə 13,3 Milyon dollar ayırır

Böyük Britaniya hökuməti, son hücumların ardından məscidlər və müsəlman mərkəzlərində təhlükəsizlik tədbirlərini gücləndirmək üçün 10 milyon funt sterlinq (təxminən 13,3 milyon dollar) vəsait ayıracaq.

Ajans.az xəbər verir ki,bu barədə hökumətin mətbuat xidməti məlumat verib.

Bəyanatda qeyd olunur: “Baş nazir Keir Starmer, Böyük Britaniyadakı məscidlərin və müsəlman dini mərkəzlərinin nifrət cinayətləri və hücumlardan qorunması üçün əlavə 10 milyon funt sterlinq təhlükəsizlik maliyyəsi ayıracağını açıqlayıb.”

Vəsait CCTV və siqnalizasiya sistemlərinin quraşdırılmasına, hasarların çəkilməsinə və təhlükəsizlik xidmətlərinin ödənilməsinə sərf olunacaq. Bu, ötən il məscid təhlükəsizliyi üçün ayrılmış 29,4 milyon funt sterlinqə (təxminən 39,2 milyon dollar) əlavədir.

Baş nazir maliyyələşdirməni oktyabrın əvvəlində İngiltərənin cənubundakı Peacehaven şəhərində yandırılan bir məscidə baş çəkdikdən sonra açıqlayıb. Hadisədə heç kim xəsarət almayıb.

Hökumət məlumatlarına görə, müsəlmanlara qarşı nifrət cinayətlərinin sayı 2024-cü ilin mart ayından 2025-ci ilin mart ayına qədər 19% artıb. Bütün dini motivli cinayətlərin 44%-i müsəlmanlara qarşı törədilib.