Gözəllik kraliçası lüks oteldən OĞURLUQ EDİB

ABŞ-də "Miss New York Elite" titulunun sahibi Keytlin Rouz Kennedi-Melanson dəbdəbəli toy mərasimindən sonra otelə 40 min dollar borclu qalmaqda ittiham olunur.

Ajans.az xarici mediaya istinadən xəbər verir ki, Manhettendə yerləşən məşhur beşulduzlu St. Regis oteli gözəllik kraliçasına qarşı məhkəmə iddiası qaldırıb. İddiada bildirilir ki, o, 2025-ci ilin sentyabrında keçirilən toy mərasiminin yekun ödənişini etməyib.

Məhkəmə sənədlərinə əsasən, cütlük əvvəlcə tədbir üçün 106 min dollar ödəyib. Lakin otelin iddiasına görə, sonradan qalan 37 min dollar ödənilməyib və hesablanmış faizlə birlikdə borcun məbləği təxminən 40 min dollara çatıb.

Toy Nyu-Yorkdakı Müqəddəs Patrik Katedralında keçirilib, daha sonra isə qonaqlar St. Regis otelində təşkil olunan ziyafətdə iştirak ediblər. Otel yalnız iaşə və qonaqlara göstərilən xidmətlər üçün təxminən 100 min dollar xərcləndiyini bildirir.

The New York Post nəşrinin məlumatına görə, Keytlin Kennedi-Melanson otelin iddialarını "cəfəngiyyat" adlandırıb. O, hazırda hüquqi nümayəndəsi olmadan məsələ ilə bağlı ətraflı şərh verməyəcəyini bildirib.

Maraqlıdır ki, iddia yalnız gözəllik kraliçasına qarşı qaldırılıb. Onun həyat yoldaşı, daşınmaz əmlak şirkətinin təsisçisi Qreq Melanson cavabdehlər siyahısına daxil edilməyib.

Qeyd edək ki, bu, Keytlin Kennedi-Melansonun maliyyə öhdəlikləri ilə bağlı ilk məhkəmə işi deyil. O, 2022-ci ildə də ödənilməmiş kirayə haqqı ilə əlaqədar məhkəmə iddiası ilə üzləşmiş, həmin mübahisə qısa müddət ərzində həll edilmişdi.