Nusret Gökçen 5,5 milyon funt sterlinq zərərə düşüb

Dünyaca məşhur türk qəssabı və restoran sahibi Nusret Gökçenin (Salt Bae) Londondakı Nusr-Et restoranı ötən il 5,5 milyon funt sterlinq zərər edib.

Ajans.az xəbər verir ki,bu barədə RestaurantDive məlumat yayıb.

Knightsbridge-də yerləşən restoran, David Beckham və Cristiano Ronaldo kimi məşhurların da ziyarət etdiyi, sosial mediada məşhurlaşmış dəbdəbəli məkanlardan biridir. Buna baxmayaraq, şirkətin maliyyə hesabatında bildirilib ki, 2024-cü il üçün yaranan böyük zərərin əsas səbəbi Gökçenin ABŞ-dakı biznesindəki geriləmə olub.

Nusret Gökçenin Nusr-Et brendinə hazırda Dubay, İstanbul, Milan, Mayami və Nyu-York da daxil olmaqla 11 restoran məxsusdur. Brend yaxın vaxtlarda Meksika və İbizada da yeni restoranlar açmağı planlaşdırır.

Baxmayaraq ki, London restoranı ötən il 10 milyon funt sterlinqdən çox gəlir əldə edib, şirkət ABŞ-dakı aktivlərin dəyərinin yenidən qiymətləndirilməsi nəticəsində böyük maliyyə itkisinə məruz qalıb. Qeyd olunur ki, bu silinmə şirkətə 6 milyon funt sterlinqə başa gəlib.

Nusr-Et-in ABŞ-dakı fəaliyyəti Britaniyada qeydiyyatdan keçmiş ana şirkətə tam məxsus olduğu üçün, itkilər məhz Böyük Britaniya şirkətinin maliyyə hesabatında əks olunub.

Brend öz zirvəsində ABŞ-da yeddi restoranla təmsil olunurdu. Lakin bu il Beverly Hills restoranının bağlanmasından sonra yalnız iki restoran fəaliyyətini davam etdirir. Daha öncə Dallas, Las-Veqas, Boston və Nyu-Yorkdakı məkanlar da bağlanıb.

Şirkət bildirib ki, artıq diqqəti ABŞ-dan beynəlxalq bazarlara yönəldib. Bununla belə, ötən ilin maliyyə itkisinə rəğmən, şirkət hələ də 2,3 milyon funt sterlinq ehtiyat vəsaitə malikdir. Bu rəqəm əvvəlki illə müqayisədə (8,1 milyon funt sterlinq) xeyli azdır.

Şəxsi sərvətinə gəldikdə isə, Nusret Gökçenin ən azı 44 milyon funt sterlinq dəyərində varidata sahib olduğu təxmin edilir.

Nusr-Et-in rəsmi menyusuna əsasən, restoranın qiymətləri də diqqət çəkir: “Nəhəng Tomahawk” bifteyi 630 funt sterlinqə, striploin 680 funt sterlinqə, xüsusi Yapon Wagyu mal əti isə hər qram üçün 99 pensə təklif olunur.