Vitkoff istefa verə bilər

ABŞ prezidentinin Yaxın Şərq üzrə xüsusi elçisi Stiven Vitkoff (Steven Witkoff) 2025-ci ilin sonunadək vəzifəsini tərk edə bilər.

Ajans.az xəbər verir ki,bu barədə məlumatı The Times of Israel qəzeti diplomatik mənbələrə istinadən yayıb.

Nəşrin məlumatına görə, Vitkoffun istefası Qəzza münaqişəsinin başa çatmasından sonra gerçəkləşə bilər. Qəzet yazır ki, artıq xüsusi nümayəndənin ofisində bu dəyişikliyə hazırlıqlar aparılır və gözlənilən kadr dəyişiklikləri müzakirə olunur.

Stiven Vitkoff ABŞ prezidentinin Yaxın Şərq üzrə nümayəndəsi olsa da, o, Ağ Evdə yüksək etimada malik şəxs kimi tanınır. Prezident Donald Trampın 2025-ci ilin yanvarında ikinci müddətə vəzifəyə başlamasından sonra Vitkoff yeni administrasiyanın Rusiyaya ilk səfər edən rəsmi nümayəndəsi olub.

Onun ilk Moskva səfəri 2025-ci il fevralın 11-də baş tutub. Vitkoff bu səfərdə narkotik qaçaqmalçılığına görə Rusiyada həbs olunmuş və səfər ərəfəsində prezident Vladimir Putin tərəfindən əfv edilmiş amerikalı vətəndaş Mark Vogelin geri qaytarılması üçün Moskvaya gedib.

Daha sonra, aprelin 25-də, Vitkoff ikinci dəfə Moskvaya səfər edib və Rusiya prezidenti ilə rəsmi görüş keçirib. Bu görüş onun bölgədə diplomatik fəallığının davam etdiyini göstərsə də, mənbələrin bildirdiyinə görə, gələcəkdə vəzifəsini tərk etməsi ehtimalı yüksəkdir.