Tramp Avropaya qarşı "mədəniyyət müharibəsi" aparmaqda ittiham olunur

Avropa Xarici Əlaqələr Şurası (ECFR) və Avropa Mədəniyyət Fondunun (ECF) birgə hesabatında ABŞ prezidenti Donald Trampın administrasiyası Avropaya qarşı məqsədyönlü şəkildə mədəniyyət müharibəsi apardığı bildirilib.

Ajans.az The Guardian-a istinadən xəbər verir ki, Tramp administrasiyası Avropa seçkilərinə müdaxilə etməyə, transatlantik münasibətləri mühafizəkar dəyərlər əsasında yenidən qurmağa və Avropanın sağçı populistlərini söz azadlığı mövzusu ətrafında bir araya gətirməyə çalışır.

ECFR və ECF mütəxəssislərinin fikrincə, Avropa İttifaqının liderləri arasında müşahidə olunan fikir ayrılıqları, qərarsız yanaşmalar və Trampa qarşı “yaltaq, sakitləşdirici və diqqəti yayındıran” münasibət bu cür siyasətləri daha da təşviq edir.

Hesabat müəlliflərindən biri, analitik Pavel Zerkan qeyd edir ki, Trampın apardığı mədəniyyət müharibəsinin əsas hədəfi birbaşa Avropadır. Onun sözlərinə görə, bu mübarizə iki səviyyədə aparılır: birincisi, Avropa siyasətinin təməlində dayanan dəyərlər üzərində ideoloji qarşıdurma formasında; ikincisi isə, beynəlxalq arenada Avropanın ləyaqəti, nüfuzu və müstəqil aktor kimi şəxsiyyəti uğrunda mübarizə şəklində.