"Nyukasl"  64 milyon avroluq təklifi rədd edib 

İngiltərənin "Nyukasl" klubu Premyer Liqanın digər təmsilçisi "Arsenal"ın Bruno Gimaraynsla bağlı 64 milyon avroluq təklifini rədd edib.  

Ajans.az xarici mətbuata istinadən xəbər verir ki, London təmsilçisi 28 yaşlı braziliyalı futbolçu üçün etdiyi təklifə müsbət cavab almayıb.

"Arsenal"ın yarımmüdafiəçi üçün yeni bir təklif irəli sürməyi planlaşdırdığı bildirilir.

Braziliyalı oyunçu 2022-ci ilin yayından "Nyukasl"da çıxış edir. O, 2025/2026 mövsümündə bütün turnirlərdə 41 oyunda meydana çıxıb, 9 qol vurub və 8 məhsuldar ötürmə müəllifi olub. Yarımmüdafiəçi DÇ-2026-da Braziliya yığmasının heyətində qrup mərhələsinin hər 3 qarşılaşmasında iştirak edib və 3 məhsuldar ötürmə ilə yadda qalıb.

Qeyd edək ki, "Transfermarkt" portalı futbolçunun dəyərini 70 milyon avro qiymətləndirir. Onun klubu ilə müqaviləsinin müddəti 2028-ci ilin yayına qədərdir.