Məşhur heykəl ağlamağa BAŞLAYIB

Avstraliyanın Rokinqem şəhərində yerləşən Lady of Lourdes Katolik Kilsəsində qeyri-adi hadisə baş verib – Madonna (Məryəm) heykəlindən yağla qarışıq göz yaşları axmağa başlayıb.

Ajans.az xəbər verir ki,bu barədə Daily Mirror nəşri məlumat yayıb.

Hadisə ilk dəfə 2003-cü ildə qeydə alınıb. Hündürlüyü təxminən 70 santimetr olan Məryəm heykəli əvvəllər heç bir xüsusiyyəti ilə seçilmirdi. Lakin 19 mart – Müqəddəs İosif Günündə heykəlin gözlərindən yağa bənzər maye axmağa başladığı müşahidə olunub. Hadisə Pasxa bayramlarına qədər davam edib və dünyanın müxtəlif yerlərindən minlərlə zəvvarın marağına səbəb olub.

Anomaliyanın səbəbini müəyyən etmək üçün heykəl dörd gün ərzində mütəxəssislər tərəfindən hərtərəfli tədqiq olunub. Onun səthi böyüdücü cihazlarla araşdırılıb, rentgen və kompüter tomoqrafiyası aparılıb. Lakin nəticələr göstərib ki, heykəldə heç bir gizli mexanizm və ya maye ötürən kanal yoxdur.

Mütəxəssislər göz yaşlarında çəhrayı çalarlı bitki yağı izləri aşkarlayıblar. Buna baxmayaraq, prosesin necə baş verdiyi hələ də izah olunmayıb.

Pert arxiyepiskopu Berri Hikki mövzu ilə bağlı verdiyi açıqlamada bildirib:

“Mən bu hadisəni möcüzə adlandırmıram. Sadəcə olaraq, baş verənləri izah etməyə kifayət qədər elmi dəlilimiz yoxdur. Bunun necə baş verdiyini bilmirik. Ancaq fərqli yozumlar mümkündür.”

Araşdırmalardan sonra heykəl əvvəlki sahibi – parishioner Patty Pauelə qaytarılıb və həmin vaxtdan etibarən kilsədə ictimai nümayişə çıxarılmayıb.