Tramp: İranın nüvə obyektlərinə hücum ediləcək

Tramp İranın nüvə obyektlərinə zərbə endirmək təhdidini yenidən gündəmə gətirib.

Ajans.az xəbər verir ki, Əl-Cəzirənin məlumatına görə, ABŞ Prezidenti Donald Tramp İranın nüvə proqramı ilə bağlı yenidən təhdidedici açıqlama verib. O bildirib ki, zərurət yaranarsa, İranın nüvə obyektlərinə hücum ediləcək.

Onun bu açıqlamaları İran rəsmilərinin ABŞ və İsrailin mümkün yeni təcavüzlərinə qarşı qəti və sarsıdıcı cavab veriləcəyini bildirməsindən sonra səslənib.

Tehran və Vaşinqton İranın xarici işlər naziri Abbas Əraqçi və Trampın xüsusi nümayəndəsi Stiv Vitkofun rəhbərliyi ilə Oman vasitəçiliyi ilə dolayısı ilə aparılan beş mərhələli danışıqlarda iştirak edirdilər. Lakin bu proses İsrailin səbəbsiz başlatdığı bir sıra təcavüzkar hücumlarla pozulub.

Sionist rejim iyunun 13-də İrana qarşı genişmiqyaslı hücuma başlayaraq 12 gün ərzində İranın hərbi, nüvə və yaşayış ərazilərinə zərbələr endirib. ABŞ isə iyunun 22-də İranın Natanz, Fordo və İsfahan şəhərlərində yerləşən üç nüvə obyektinə hərbi hücumlar həyata keçirib.

İran silahlı qüvvələri təcavüzdən dərhal sonra güclü cavab zərbələri endirib. İslam İnqilabı Keşikçiləri Korpusu (SEPAH) Hava-Kosmik Qüvvələri "Həqiqi Vəd III" əməliyyatı çərçivəsində işğal olunmuş ərazilərdəki şəhərlərə qarşı 22 mərhələli raket hücumu təşkil edərək sionist rejimə ciddi itkilər yetirib.

ABŞ hücumlarına cavab olaraq İran silahlı qüvvələri Qətərdə yerləşən, Qərbi Asiyanın ən böyük ABŞ hərbi bazası olan Əl-Üdeyd hava bazasına da raket zərbələri endirib.

İyunun 24-də qüvvəyə minmiş atəşkəs döyüşlərin dayandırılmasına səbəb olub.