Trampdan stabilkoin qanunu

ABŞ: Tramp dollar əsaslı stabilkoinlərin yolunu açan qanunu imzaladı.

Ajans.az dw.com-a istinadən xəbər verir ki, ABŞ Prezidenti Donald Tramp stabilkoinlər üçün tənzimləyici çərçivə yaradan qanunu imzalayıb. Bu, ABŞ dolları əsasında yaradılmış kriptovalyutaların ödənişlər və pul köçürmələri üçün gündəlik istifadəsinə yol aça bilər.

"GENIUS Aktı" (ABŞ stabilkoinləri üçün Milli İnnovasiyaların Yönləndirilməsi və Qurulması Qanunu) adlanan bu qanun layihəsi əvvəlcə Senatda təsdiq olunub, daha sonra Nümayəndələr Palatasında 308 lehinə, 122 əleyhinə səslə qəbul edilib.

“GENIUS Aktı — mənim adımı qoyublar,” deyə Tramp qanunun imzalanma mərasimində bildirib. Ağ Evdə keçirilən mərasimdə bir neçə hökumət rəsmisi, qanunverici və kripto sənayesi nümayəndələri iştirak edib.

“Bu həm dollar, həm də ölkə üçün yaxşıdır. Buna görə sizi əvvəldən dəstəklədim. Bir az da səs üçün etdim,” deyə o əlavə edib və kripto sənayesinə işarə edib.

Bu qanun kriptovalyuta sənayesi və onun tərəfdarları üçün böyük qələbə sayılır. Onlar uzun müddətdir ki, bu cür qanunun qəbulunu tələb edirdilər ki, kriptovalyutaların istifadəsi qanuniləşsin və banklar, pərakəndə satıcılar və istehlakçılar onlardan istifadəyə daha çox maraq göstərsinlər.

Sənaye ötən il keçirilən seçkilərdə Tramp kimi kriptoya dəstək verən namizədləri dəstəkləmək üçün 245 milyon dollardan (210 milyon avro) çox ianə edib.