Ukrayna Trampdan silah istəyib

Ukrayna Trampdan Moskvaya zərbə endirə bilən silah istəyib.

Ajans.az lenta ru-ya istinadən xəbər verir ki, ABŞ prezidenti Donald Tramp və onun ukraynalı həmkarı Vladimir Zelenski Ukrayna Silahlı Qüvvələrinə (USQ) Moskva və Sankt-Peterburqa zərbə endirə bilən uzaqmənzilli qanadlı Tomahawk raketlərinin verilməsini müzakirə ediblər. Bu barədə The Financial Times qəzeti mənbələrə istinadən məlumat yayıb.

“Mənbənin sözlərinə görə, ukraynalılar onlara Tomahawk raketləri — təxminən 1600 kilometr mənzilə malik dəqiq zərbə qabiliyyətli qanadlı raketlər — verilməsini istəyiblər. Lakin Tramp administrasiyası da, Bayden administrasiyası kimi, Ukraynanın yetərincə təmkinli olmayacağından narahat idi,” – nəşr bildirib.

Bundan əvvəl hərbi ekspert Sergey Glazunov “Lenta.ru”ya verdiyi müsahibədə bildirib ki, ABŞ Rusiya ilə birbaşa münaqişəyə girməyə hazır deyil və buna görə də Moskva və Sankt-Peterburqa qədər çata bilən Tomahawk raketlərini Ukraynaya verməyəcək.