Tramp Tayvana silah satışını ARTIRIR

Birləşmiş Ştatlar Çini cilovlamaq səyləri çərçivəsində Tayvana silah satışını prezident Donald Trampın ilk dövründəki səviyyəyə çatdırmağı planlaşdırır.

Ajans.az xəbər verir ki, bu barədə iki amerikalı məmur məlumat yayıb.

Mənbələrin sözlərinə görə, əgər ABŞ-nin Tayvana silah satışı sürətlənsə, bu, Trampın adaya bağlılığı ilə bağlı narahatlıqları azalda bilər.

Üstəlik, Ağ Ev rəhbərinin bu addımı ABŞ və Çin arasında gərgin münasibətlərə yeni çəkişmələr əlavə edəcək.

Bu ilin yanvarında ABŞ prezidenti Donald Tramp seçildikdən dərhal sonra onun milli təhlükəsizlik üzrə müşaviri Mayk Uols bəyan edib ki, Tramp ABŞ-nin Tayvana silah və hərbi texnika tədarükünün sürətini artırmaq niyyətindədir.

Rəsmi daha sonra izah edib ki, Birləşmiş Ştatların Tayvanla 20 milyard dollardan çox məbləğdə yerinə yetirilməmiş müqavilələri var və onlar bu vəsaiti artıq ödəyiblər. ABŞ bu silahları buraxmaq üçün çox çalışmalıdır, Çinə qarşı çəkindirici vasitə kimi onlara artıq ödədiklərini verməlidir.