Mehriban Vəliyeva: “İnsanın milli kimliyi onun ən vacib pasportudur”
Milli Məclisin deputatı Mehriban Vəliyeva bu gün Azərbaycan Dillər Universitetinin Beynəlxalq Jurnalistika Şöbəsinin tələbələri ilə görüşüb.
Ajans.az-ın xəbərinə görə, görüşdə Azərbaycan dövlətinin gənclərə olan diqqəti, Cənab Prezidentin gənclər siyasəti, ölkəmizin inkişafında gənclərin rolu, müasir zamanda gənclərin görməli olduğu işlər, təhsil və digər mühüm əhəmiyyətli sahələrdən söz açılıb.
Görüş zamanı Mehriban Vəliyeva tələbələrlə milli ideallar və jurnalistikanın cəmiyyətdəki rolu haqqında ətraflı söhbət edib. O, dövlətçilik prinsiplərinin gücləndirilməsinin, milli dəyərlərin qorunmasının və gənc jurnalistlərin milli şüurla təchiz olunmasının önəmini vurğulayıb. Dövlətçiliyin güclənməsində və milli idealların qorunmasında medianın roluna diqqət çəkərək, gənclərin bu istiqamətdə məsuliyyətli olmalarını tövsiyə edib.
Tələbələrin marağına və diqqətinə səbəb olan görüşdə qarşılıqlı fikir mübadiləsi aparılıb, suallar cavablandırılıb.
Ən yaxşı sualı səsləndirən fəal tələbələrə Qurban Səidin “Əli və Nino” romanı hədiyyə edilib.
Görüşdə çıxış edən Azərbaycan Dillər Universitetinin rektor köməkçisi Anar Osmanlı, Beynəlxalq Jurnalistika Şöbəsinin müdiri Nərgiz Çərkəzqızı görüşün əhəmiyyətini vurğulayaraq iştirakına görə Milli Məclisin deputatı Mehriban Vəliyevaya, görüşün təşkilində göstərdiyi dəstəyə görə tanınmış jurnalist Tural Müseyibova təşəkkürlərini çatdırıblar.
Səmimi və dinamik ünsiyyətlə yekunlaşan görüşdən xoş təəssüratlarla ayrılan tələbələr tezliklə yenidən deputat Mehriban Vəliyeva ilə görüşmək istədiklərini bildiriblər.
FOTOLAR:
