Marsda insan qanından evlər tikiləcək - ŞOK
Beynəlxalq alimlər qrupu tikinti materiallarının yaradılması üçün qan, zülal və digər insan bioloji mayelərindən istifadə etməyi təklif edib.
Ajans.az xəbər verir ki, araşdırma Acta Astronautica jurnalında dərc olunub.
Elmi işin müəllifləri qeyd edib ki, Marsa ilk ekspedisiya özü ilə məhdud miqdarda resurs götürə biləcək. Bununla bağlı mütəxəssislər insan qanı əsasında binaların tikintisi üçün istifadə edilə bilən material hazırlayıblar.
Tədqiqatçılar insan qanını dayanıqlı qədim Roma betonuna bənzədib. “Bir az qəribə olsa da, qandan Marsda tikinti üçün dayanıqlı beton və ya kərpic yaratmaq üçün istifadə oluna bilər” deyə müəlliflər qeyd ediblər.
Materialda deyilir ki, Mars torpağında bir neçə növ beton üçün uyğun kimyəvi tərkib var. Keçmiş Mars ekspedisiyalarının məlumatlarını təhlil edən alimlər geopolimer və maqnezium-silisium qarışıqları əsasında 11 növ beton müəyyən edib. Materialların gücünü artırmaq üçün onlara qan, tər və göz yaşı əlavə ediləcək. Eyni zamanda, Mars şəraitində vacib olan məhlulun hazırlanması üçün su tələb olunmur.
Alimlər deyirlər ki, bir astronavt öz qanından 72 həftə ərzində bir nəfərlik bir quruluş yaratmaq üçün kifayət qədər protein istehsal edə bilər.
