ABŞ-də dəfn mərasimlərinə yeni TREND-“Barbie” üslublu TABUTLAR

ABŞ-nin Ohayo ştatında fəaliyyət göstərən dəfn xidməti rəhbəri Den Madden ənənəvi dəfn mərasimləri ilə bağlı stereotipləri dəyişməyə çalışır. O, parlaq çəhrayı “Barbie” üslublu tabutlar və qeyri-adi dizaynlı küllər üçün qablar təqdim etməklə diqqət çəkib.

Ajans.az xəbər verir ki, 23 illik təcrübəyə malik olan Madden Stark Memorial Funeral Home dəfn evinin sahibidir. Onun sözlərinə görə, bir çox ailələr yaxınlarının şəxsiyyətini əks etdirən daha fərqli və rəngarəng seçimlər axtarır.

Bu məqsədlə o, müxtəlif formalı urna və dəfn aksesuarlarının satıldığı FashUrns platformasını yaradıb. Burada boulinq sancağı, oyun pultu, tısbağa və məşhur fantastik filmlərdən ilhamlanan dizaynlarda məhsullar təqdim olunur.

Madden bildirib ki, insanlar ənənəvi tabut və urnalarla kifayətlənmək istəmir, daha fərdi və yaddaqalan seçimlərə üstünlük verirlər.

Sosial şəbəkələrdə “Dan the Funeral Man” ləqəbi ilə tanınan Madden qeyri-adi dəfn məhsullarını nümayiş etdirən videolar paylaşır. O, xüsusilə gənc auditoriya arasında böyük maraq qazanaraq minlərlə izləyici toplayıb.

Madden hesab edir ki, vida mərasimləri yalnız kədər deyil, həm də dünyasını dəyişən şəxsin həyatını və xarakterini əks etdirən bir tədbir olmalıdır.