Qızdırılan balığa görə həmkarına HÜCUM ETDİ

ABŞ-nin Cənubi Karolina ştatında polis detektivi bölmə daxilində baş verən mübahisə zamanı həmkarına silah tuşladığı üçün həbs edilib və xidmətdən uzaqlaşdırılıb.

Ajans.az xəbər verir ki, hadisə mayın 30-da Myrtle Beach Polis İdarəsində qeydə alınıb. İstintaq materiallarına görə, 46 yaşlı detektiv Maykl DeBiase ilə patrul zabiti arasında ortaq istifadə olunan mikrodalğalı sobada qızdırılan balığın qoxusuna görə mübahisə yaranıb.

Məlumata görə, şifahi mübahisə qısa müddətdə gərginləşib. Müstəntiqlər bildirirlər ki, qarşıdurma zamanı DeBiase xidməti tapançasını qabından çıxararaq həmkarına tuşlayıb.

Hadisədən dərhal sonra polis rəhbərliyi detektivi işdən çıxarıb və daxili araşdırmaya başlayıb. Daha sonra araşdırmaya Cənubi Karolina Hüquq-Mühafizə Şöbəsi də qoşulub.

İstintaqın nəticəsində Maykl DeBiase bir şəxsə qanunsuz olaraq odlu silah göstərmək və tuşlamaqda ittiham edilərək həbs olunub. Myrtle Beach Polisi isə onun daxili qaydaları pozduğuna görə şöbədən xaric edildiyini açıqlayıb.

Polis rəhbərliyinin yaydığı bəyanatda qeyd olunub ki, keçmiş detektivin davranışı qurumun peşəkar standart və dəyərlərinə uyğun deyil. Bununla yanaşı, hadisənin hüquq-mühafizə orqanlarının öz əməkdaşlarını da məsuliyyətə cəlb etmək prinsipinə sadiq olduğunu göstərdiyi vurğulanıb.

DeBiase həbs olunduqdan sonra Horry County Saxlama Mərkəzinə aparılıb. O, daha sonra 5 min dollar girov müqabilində sərbəst buraxılıb.

Hazırda keçmiş detektiv barəsində cinayət işi üzrə məhkəmə araşdırması davam edir.