Məşhurlar kütləvi şəkildə izləyicilərini İTİRİR: Nə baş verir?

Sosial şəbəkədə baş verənlər artıq qeyri-rəsmi olaraq “2026-cı ilin Böyük Təmizlənməsi” adlandırılır.

Ajans.az xəbər verir ki, Instagram istifadəçiləri son günlər izləyici sayının kəskin azalmasından şikayət edir. Bu proses həm adi kontent yaradıcılarına, həm də dünyanın ən məşhur simalarına təsir göstərib.

Məlumatına görə, platforma botlara, spam hesablarına və “qeyri-üzvi” izləyicilərə qarşı genişmiqyaslı təmizləmə kampaniyasına başlayıb. Proses əsasən avtomatlaşdırılmış fəaliyyətlərdən və süni şəkildə auditoriya artıran xidmətlərdən istifadə edən profilləri hədəf alır. Meta hələlik məsələ ilə bağlı rəsmi açıqlama verməyib. Bununla belə, istifadəçilər hesabların silinməsinin qısa müddət ərzində dalğalarla baş verdiyini bildirirlər.

“Təmizləmə” xüsusilə məşhurların hesablarında nəzərə çarpır. Məlumatlara görə, Kylie Jenner bir neçə saat ərzində 14–15 milyon izləyici itirib. Cristiano Ronaldo təxminən 8 milyon, Selena Gomez isə 6 milyon izləyici itirib. Həmçinin Ariana Grande, Taylor Swift və Justin Bieber də oxşar itkilərlə üzləşdiklərini bildiriblər.

Musiqi qrupları arasında BLACKPINK xüsusilə böyük auditoriya itkisi ilə diqqət çəkib — təxminən 10 milyon izləyici. İstifadəçilər həmçinin BTS qrupunun səhifəsində də azalma müşahidə edildiyini qeyd edirlər.

Problem yalnız məşhurlarla məhdudlaşmır. Bir çox bloqçu bir neçə yüzdən on minlərlə izləyici itirdiyini bildirir. Orta hesabla kiçik və orta ölçülü kontent yaradıcılarının auditoriyasında 2–5% azalma qeydə alınıb.

Bu vəziyyət yeni süni intellekt əsaslı moderasiya alqoritmləri ilə bağlı ola bilər. Sistem şübhəli aktivliyi, saxta hesabları və koordinasiyalı “qeyri-səmimi” davranışları avtomatik şəkildə müəyyən edib silir. Bununla yanaşı, bəzi istifadəçilər real hesabların da səhvən məhdudlaşdırıldığını iddia edir.

Bundan əlavə, platforma son vaxtlar kontent təşviqi qaydalarını yeniləyib. Instagram artıq orijinal paylaşımlara üstünlük verir və əsasən başqalarının məzmununu paylaşan və ya avtomatlaşdırılmış süni intellekt alətlərindən geniş istifadə edən səhifələrin əhatə dairəsini məhdudlaşdıra bilər.