Mumiyanın içindən GÖRÜN NƏ ÇIXDI...

Misirdə aparılan arxeoloji qazıntılar zamanı nadir tapıntı qeydə alınıb – bir mumiyanın içərisində qədim yunan ədəbiyyatına aid mətn aşkar edilib.

Ajans.az Arkeonews-a istinadən xəbər verir ki, İspaniya-Misir ekspedisiyasının arxeoloqları qədim Oksirinx şəhərində yerləşən Roma dövrünə aid nekropolda aparılan tədqiqatlar zamanı Homerin “İliada” əsərindən fraqment olan papirus parçası tapıblar.

Aşkarlanan fraqment poemanın ikinci kitabı – “Gəmilər kataloqu”na aiddir. Bu hissədə Troya müharibəsinə yollanan yunan qüvvələrinin siyahısı təqdim olunur. Mütəxəssislərin sözlərinə görə, belə bir mətnin dəfn mərasimi kontekstində tapılması olduqca nadir hal hesab olunur.

Misir Qədim Əsərlər Ali Şurasının baş katibi Hişam Əl-Leyti bildirib ki, bu kəşf Oksirinx şəhərinin yerli elitasının yalnız yunan mədəniyyətindən təsirlənmədiyini, eyni zamanda onun ədəbi ənənələri ilə yaxından bağlı olduğunu göstərir.

Qeyd olunur ki, həmin nekropolda qızıl dillər və müxtəlif dəfn əşyaları şəklində amuletlər olan digər mumiyalar da aşkar edilib.