Antarktidada yeni ada kəşf EDİLİB

Antarktidada “Polarstern” buzqıran gəmisi Joinville adası yaxınlığında, Ueddell dənizi bölgəsində təsadüfən naməlum bir ada aşkar edib.

Ajans.az xəbər verir ki, əvvəlcə heyət obyekti çirkli aysberq hesab edib, lakin daha yaxın müşahidələr nəticəsində onun qaya olduğu müəyyən edilib.

Buzqıran gəmi adaya təxminən 150 metr məsafəyə qədər yaxınlaşıb. Dron vasitəsilə aparılan çəkilişlər nəticəsində obyektin 130 metr uzunluğunda, 50 metr enində və su səthindən təxminən 16 metr hündürlüyündə olduğu müəyyənləşib. Peyk görüntülərində isə ərazi buz örtüyü səbəbindən aysberqlərdən demək olar ki, seçilmir və təhlükəli zona kimi qeydə alınıb.

Bu, regionda qeydə alınan yeganə yeni kəşf deyil. Aprelin əvvəlində Rusiya Elmlər Akademiyasının Sankt-Peterburq Federal Tədqiqat Mərkəzi və Arktika və Antarktika Tədqiqat İnstitutunun alimləri Qərbi Antarktidada, Berks burnu yaxınlığında yeni təbii formasiya — vahə aşkar etdiklərini bildiriblər. Tədqiqat zamanı əvvəllər öyrənilməmiş 18 göl müəyyən edilib. Ərazinin təxminən 2,2 kvadrat kilometr olduğu, orta illik temperaturun isə -12°C təşkil etdiyi qeyd olunub. Vahədə pinqvinlər, suitilər və Antarktika leyləklərinin yaşadığı bildirilir.