Səudiyyə Ərəbistanının ən yaşlı kişisi 142 yaşında VƏFAT EDİB

Səudiyyə Ərəbistanında krallığın ən yaşlı kişisi hesab edilən Nasir əl-Vadai 142 yaşında vəfat edib.

Ajans.az xəbər verir ki,bu barədə onun ailəsi məlumat verib. Xəbəri “Okaz” qəzeti yayıb.

Ailəsinin bildirdiyinə görə, Nasir əl-Vadai 1884-cü ildə, Ərəbistan yarımadasındakı bölgələr birləşərək Səudiyyə Ərəbistanı Krallığı yaradılmamışdan əvvəl dünyaya gəlib.

Yaxınları onun uzunömürlülüyünü sadə və ölçülü qidalanma tərzi ilə əlaqələndirirlər. Məlumata görə, əl-Vadai az yeyir, əsasən cücərməmiş buğda, bal, kişmiş və yağ qəbul edirdi. Onun ən sevdiyi içkinin isə ayran olduğu qeyd olunur.

“Okaz” yazır ki, yüz yaşını keçməsinə baxmayaraq, Nasir əl-Vadai fiziki cəhətdən güclü olub və son illərinə qədər sosial cəhətdən aktiv həyat sürüb.

O, üç dəfə evlənib və ümumilikdə 134 nəfərlik nəsil — övladlar və nəvələr qoyub. Bildirilir ki, əl-Vadai sonuncu dəfə 110 yaşında evlənib və bu nikahdan doqquz uşağı dünyaya gəlib.