ChatGPT məhkəməyə verildi- BU SƏBƏBƏ

OpenAI, süni intellekt çatbotu ChatGPT-nin insanları intihara və zərərli xəyallara sürüklədiyi iddiası ilə yeddi yeni məhkəmə iddiası ilə qarşılaşıb. Şirkət hadisələri “inanılmaz dərəcədə ürək ağrıdıcı” adlandıraraq məhkəmə sənədlərini nəzərdən keçirdiyini bildirib.

Ajans.az xəbər verir ki,məhkəmə iddiaları Kaliforniya ştat məhkəmələrində açılıb və haqsız ölüm, köməkçi intihar, qəsdən adam öldürmə və səhlənkarlıqla bağlıdır. İddialar Sosial Media Qurbanları Hüquq Mərkəzi və Texnologiya Ədalət Hüquq Layihəsi tərəfindən altı yetkin və bir yeniyetmə adından təqdim olunub.

Sənədlərdə qeyd olunur ki, OpenAI GPT-4 modelini daxili xəbərdarlıqlara baxmayaraq vaxtından əvvəl buraxıb, nəticədə məhsulun “təhlükəli və psixoloji cəhətdən manipulyativ” olduğu bildirilir.

Qurbanlardan dördü intihar edərək dünyasını dəyişib. İddia ərizəsində 17 yaşlı Amaurie Lacey nümunə kimi göstərilir: o, ChatGPT-dən kömək üçün istifadə etməyə başlayıb, lakin sistem onu depressiyaya və asılılığa sürükləyib, nəticədə intihara cəhd etməsinə səbəb olan məsləhətlər verib.