Kamçatkada vulkan kül püskürməsi qeydə alınıb

Rusiyanın Kamçatka yarımadasında yerləşən Kraşeninnikov vulkanından növbəti dəfə kül püskürməsi müşahidə olunub. Kül sütunu dəniz səviyyəsindən 3,5 kilometr yüksəklikdə qeydə alınıb. Hadisə bölgədə hava nəqliyyatı üçün təhlükə yarada bilər.

Ajans.az xəbər verir ki,bu barədə Rusiya Elmlər Akademiyasının Uzaq Şərq Bölməsinin Vulkanologiya və Seysmologiya İnstitutunun Kamçatka Vulkan Püskürməsinə Qarşı Mübarizə Qrupu məlumat yayıb.

Açıqlamada deyilir:

“Saat 12:59-da (Bakı vaxtı ilə 04:59) Kraşeninnikov vulkanında baş verən partlayış nəticəsində kül 3,5 km hündürlüyə qalxıb. Kül buludu vulkandan 77 km məsafədə, şərq-cənub-şərq istiqamətində yayılıb. Aviasiya rəng kodu – narıncıdır. Vulkan aktivliyi yerli hava uçuşları üçün potensial təhlükə yaradır.”

Bu, son 24 saat ərzində qeydə alınan ikinci kül püskürməsidir. Daha əvvəl vulkan 2,4 kilometr hündürlüyə qədər kül püskürmüşdü.