Hindistan və Çin birbaşa uçuşların bərpasına başlayır

Hindistan Xarici İşlər Nazirliyi bu qərarı iki ölkə arasında əlaqələrin tədricən normallaşması istiqamətində mühüm addım kimi dəyərləndirib.

Ajans.az xəbər verir ki,2020-ci ildə Himalay sərhədində baş verən və ölümlə nəticələnən hərbi toqquşmalardan sonra iki ölkə arasında birbaşa aviareyslər dayandırılmışdı.

 Galvan vadisindəki insidentdə ən azı 20 Hindistan və 4 Çin hərbçisi həlak olmuşdu. Bu, 1975-ci ildən bəri ilk ölümcül qarşıdurma idi və münasibətlərin kəskin şəkildə soyumasına səbəb olmuşdu.

 Son bir il ərzində Dehli və Pekin münasibətlərin bərpası və sərhəddəki gərginliyin azaldılması üçün addımlar atıblar. Yüksək səviyyəli rəsmilər bir neçə dəfə danışıqlar aparıb və görüşlər keçiriblər.

Hindistanın ən böyük büdcə aviaşirkəti IndiGo açıqlayıb ki, oktyabrın 26-dan etibarən Kolkata–Quançjou marşrutu üzrə birbaşa uçuşlar bərpa olunacaq.

 Hindistan Xarici İşlər Nazirliyi bəyan edib ki, uçuşların bərpası iki ölkə arasında insanlararası əlaqələrin genişlənməsinə və ikitərəfli münasibətlərin normallaşmasına mühüm töhfə verəcək.