Google 10 ildən sonra loqosunu yeniləyir

Texnologiya nəhəngi Google, on il ərzində ilk dəfə loqosunu yenilədiyini elan edib. Şirkət bildirir ki, bu dəyişiklik süni intellekt əsrində brendin təkamülünü və vizual identifikasiyanın yenilənməsini əks etdirir.

Ajans.az xəbər verir ki,bu barədə ilk olaraq The Verge nəşri məlumat yayıb.

Google-un 2015-ci ildən bəri istifadə etdiyi tanınmış “G” simvolu – qırmızı, sarı, yaşıl və mavi rənglərdən ibarət dizayn – yenilənmiş qradient rəng keçidləri və daha canlı tonlarla əvəzlənib. Yeni dizaynda bu dörd rəng tək bir axıcı gradient şəklində təqdim olunur və əvvəlkindən daha parlaq, daha ekspressiv görünür.

Bu stil artıq Google-un süni intellekt platforması olan Gemini xidmətinin loqosunda istifadə olunur və indi bütün Google məhsullarına tətbiq olunmağa başlanıb.

“Bu vizual yeniləmə, Google-un süni intellekt dövründəki təkamülünü və gələcəyə yönəlmiş yanaşmasını təcəssüm etdirir”, – deyə şirkətin açıqlamasında bildirilir.

Yeni “G” loqosu ilk olaraq 2025-ci ilin may ayından etibarən Android və iOS əməliyyat sistemlərində görünməyə başlayıb. Hazırda isə bu dəyişiklik bütün Google xidmətləri və platformaları üzrə mərhələli şəkildə həyata keçirilir.

Yenilənmiş vizual üslubun, şirkətin generativ süni intellekt strategiyası və Gemini əsaslı texnologiyalarla daha sıx şəkildə inteqrasiya edilməsi fonunda brendin müasir trendlərə uyğunlaşdırılması məqsədi daşıdığı vurğulanır.