İspaniyada COVID-19 epidemiyası: 4 nəfər ölüb

İspaniyanın Sevilya şəhərində yerləşən qocalar evində COVID-19 və A qripi epidemiyası nəticəsində azı 4 nəfər ölüb, 22 nəfər yoluxub, 6 nəfər isə xəstəxanaya yerləşdirilib.

Ajans.az xəbər verir ki,bu barədə İspaniyanın Səhiyyə Nazirliyi rəsmi məlumat yayıb.

Hadisə Sevilyanın La Alqaba bölgəsində yerləşən yaşlılar üçün qayğı mərkəzində baş verib. Yoluxma halları bir neçə gün əvvəl qeydə alınıb və araşdırmalar nəticəsində həm COVID-19, həm də A tipi qrip virusunun yayılması təsdiqlənib.

Nazirlik bildirir ki, həlak olan şəxslərin hamısı döş qəfəsi infeksiyalarından əziyyət çəkib və həm COVID, həm də qrip virusuna eyni anda yoluxublar. Xəstəxanaya yerləşdirilən 6 nəfərdən 2-si sağalıb və evə buraxılıb, 1 nəfərin isə müalicəsi davam edir.

Səlahiyyətli qurumlar qeyd edir ki, bu halların mövsümi peyvənd kampaniyasından öncə baş verməsi narahatedici tendensiyadır. Bildirilir ki, A tipi qripə yoluxma hallarına artıq yay aylarında da rast gəlinib, bu isə tənəffüs yolu infeksiyalarının dövriyyəsinin gücləndiyini göstərir.

İspaniya hökuməti və səhiyyə orqanları əhaliyə gigiyena qaydalarına ciddi əməl etməyi, qapalı məkanlarda havalandırmanı təmin etməyi və xüsusilə yaşlılar və xroniki xəstəliklərdən əziyyət çəkənlərin qoruyucu tədbirlərə riayət etməsini tövsiyə edir.

"COVID-19 hələ də bizimlədir və təhlükə tam keçməyib", – deyə Səhiyyə Nazirliyinin bəyanatında vurğulanır.

Son həftələrdə Andalusiya bölgəsində tənəffüs yolu ilə yayılan virus infeksiyalarında artım müşahidə olunur. Ekspertlər bunun qrip və COVID infeksiyalarının adi haldan daha erkən və intensiv şəkildə yayılacağının əlaməti ola biləcəyini bildirirlər.

Səlahiyyətlilər risk qrupunda olan şəxslərin – yaşlılar, immun sistemi zəif olanlar və xroniki xəstəliyi olanların – simptomlar hiss edən kimi dərhal izolyasiya olunmasını və tibbi yardıma müraciət etməsini tövsiyə edir.