Alimlər dəniz bakteriyası xərçəng hüceyrələrini məhv etdiyini aşkar ediblər

Çin Elmlər Akademiyasının tədqiqatçıları, dəniz bakteriyası Spongiibacter nanhainus-dan təcrid edilmiş EPS3.9 adlı ekzopolisaxaridin bəzi xərçəng hüceyrələrində öz-özünə məhvetmə mexanizmini işə saldığını müəyyən ediblər.

Ajans.az The FASEB Journal-a istinadən xəbər verir ki, EPS3.9 əsasən mannoza və qlükozadan ibarət olan bir molekuldur. Laboratoriya testləri göstərib ki, bu maddə şiş hüceyrələrində piroptoz adlanan – proqramlaşdırılmış hüceyrə ölümünün iltihablı və aqressiv formasını aktivləşdirə bilir.

Piroptoz, klassik apoptozdan fərqli olaraq, hüceyrə membranının dağıdılması və immun sisteminə xəbərdarlıq siqnallarının buraxılması ilə müşayiət olunur. Bu isə onu xərçənglə mübarizədə potensial silaha çevirə bilər.

Tədqiqat nəticəsində məlum olub ki, EPS3.9 molekulu birbaşa hüceyrə membranındakı lipid molekullarına təsir göstərir və bu təsir iltihabi zəncirvari reaksiyaya səbəb olur. Molekulun bu təsiri lösemi hüceyrələri modellərində müşahidə edilib.

Bundan əlavə, qaraciyər xərçəngi olan laboratoriya siçanlarında aparılan təcrübələrdə EPS3.9:

• şişin böyüməsini ləngidib,
• xərçəngə qarşı immun reaksiyanı gücləndirib.

Araşdırmanın rəhbəri, Çin Elmlər Akademiyasının doktoru Çaomin Sun bildirib ki, bu kəşf dəniz mikroorqanizmlərinin yeni dərman mənbəyi kimi rolunu bir daha təsdiqləyir. Onun sözlərinə görə:

“EPS3.9-un kəşfi, piroptozu hədəfləyən yeni və daha seçici xərçəng əleyhinə dərmanların hazırlanması üçün ümidverici bir başlanğıcdır. Bu yanaşma həm də sağlam toxumalar üçün daha az toksik ola bilər.”

Alimlər, həmçinin vurğulayırlar ki, EPS3.9-un immun sistemini aktivləşdirməsi, onun mövcud immunoterapiya metodları ilə birgə istifadəsini də mümkün edə bilər.

Bununla belə, tədqiqatçılar qeyd edirlər ki, heyvanlar üzərində əldə edilən nəticələr insanlarda eyni təsiri göstərməyə bilər. Buna görə də EPS3.9-un insan orqanizmində effektivliyini və təhlükəsizliyini qiymətləndirmək üçün genişmiqyaslı klinik sınaqların keçirilməsi vacib hesab olunur.