Tramp Azərbaycan əvəzinə Kamboca dedi

ABŞ-ın sabiq prezidenti Donald Tramp yenidən coğrafi qarışıqlıqla gündəmə gəlib. C-SPAN kanalına verdiyi son açıqlamada Tramp, Kamboca ilə Ermənistan arasında guya baş vermiş bir müharibəni dayandırdığını iddia edib. Əslində isə onun istinad etdiyi münaqişə Ermənistanla Azərbaycan arasında baş vermiş Dağlıq Qarabağ savaşına aiddir.

Ajans.az xəbər verir ki,çıxışında Tramp, "Kamboca ilə Ermənistan arasında çox ciddi bir müharibə başlayırdı və biz onu dayandırdıq," — deyə bildirib. O, münaqişənin "çox təhlükəli" ola biləcəyini və zamanında müdaxilə etməklə "çox sayda həyatların xilas edildiyini" söyləyib.

Lakin Trampın bəyanatları ciddi fakt səhvləri ilə dolu olub. Ermənistan heç bir zaman Kamboca ilə müharibə aparmayıb. Əslində Trampın istinad etdiyi hadisə, Ermənistanla Azərbaycan arasında 2020-ci ilin payızında baş verən 44 günlük İkinci Qarabağ müharibəsidir. Bu müharibə Rusiya vasitəçiliyi ilə əldə olunmuş atəşkəs razılaşması ilə başa çatmışdı.

Tramp çıxışında digər ölkələrin adlarını da qarışdıraraq, ABŞ-ın eyni zamanda "Kosovo, Serbiya, İran, Misir və Efiopiya" kimi ölkələrlə də "yaxşı münasibətlər qurduğunu" bildirib. O, həmçinin Efiopiyada inşa olunan dünyanın "ən böyük bəndindən" danışaraq, bu layihəni də özünün nailiyyəti kimi təqdim edib.

Trampın ölkələri və liderləri qarışdırması yeni hal deyil. Daha əvvəlki çıxışlarında o, Ukrayna prezidenti Volodimir Zelenskini səhvən “Rusiya prezidenti” adlandırmış, Macarıstanın baş naziri Viktor Orbanı isə "Türkiyənin lideri" olaraq təqdim etmişdi. Bu səhv Trampın Orbanı Türkiyə prezidenti Rəcəb Tayyib Ərdoğanla qarışdırdığını göstərmişdi.

Xatırladaq ki, avqustun ortalarında "Fox News" telekanalına verdiyi müsahibədə Tramp öz prezidentliyi dövründə “beş müharibəyə son qoyduğunu” və “minlərlə insanın həyatını xilas etdiyini” iddia etmişdi. Lakin bu bəyanatlara dair dəfələrlə dəqiqlik və sübut tələb olunub.

Trampın bu cür faktual səhvlərlə çıxış etməsi, 2024-cü il prezident seçkiləri ərəfəsində onun xarici siyasət bilikləri və yaddaş qabiliyyəti ilə bağlı ictimaiyyət arasında suallar doğurur.