Kirkin ölümünə sevinənlər CƏZALANDIRILMALIDIR - Vance-dən SƏRT REAKSİYA

ABŞ-nin vitse-prezidenti C.D. Vance bildirib ki, mühafizəkar təsir sahibi Charlie Kirk-in öldürülməsini qeyd edən insanlar məsuliyyətə cəlb olunmalıdır.

Ajans.az BBC-yə istinadən xəbər verir ki, Vance, Charlie Kirk Şousunun bir buraxılışında qonaq aparıcı qismində çıxış edərkən deyib: “Onları ifşa edin, hətta rəhbərlərinə bildirin. Biz siyasi zorakılığa inanmırıq, amma sivil davranışa inanırıq”. 

Pilotlar, tibb işçiləri, müəllimlər və bir Gizli Xidmət əməkdaşı da daxil olmaqla bir sıra şəxslər, Kirkin ölümü ilə bağlı sosial şəbəkələrdə yolverilməz paylaşımlara görə işdən çıxarılıb və ya müvəqqəti vəzifələrindən uzaqlaşdırılıb. Tənqidçilər bu tip işdən çıxarılmaların söz azadlığına və işçi hüquqlarına təhlükə yaratdığını desələr də, ABŞ şirkətləri işçiləri istədikləri səbəbdən işdən çıxarmaqda geniş səlahiyyətə malikdirlər.

Vance-in fikirləri bazar ertəsi yayımlanan Charlie Kirk Şousunun buraxılışında səsləndirilib. Həmin verilişdə vitse-prezident bildirib ki, solçu amerikalılar “siyasi zorakılığı müdafiə etməyə və bunu qeyd etməyə daha meyillidirlər”.  “Siyasi sui-qəsdin qeyd olunmasında heç bir sivil davranışdan söhbət gedə bilməz",- Deyə Vance əlavə edib.