Özbəkistan dəhşətli yol qəzasında ölənlərin sayı 13-ə çatıb

Daşkənd vilayətinin Anqren şəhərində baş vermiş ağır yol-nəqliyyat hadisəsi nəticəsində azı 13 nəfər həyatını itirib, bir neçə nəfər isə müxtəlif dərəcəli bədən xəsarətləri alıb.

Ajans.az xəbər verir ki,bu barədə "Daryo" portalı Fərqanə vilayətinin hakimi Xayrullo Bozorovun 9 sentyabr tarixli sərəncamına istinadla məlumat yayıb.

İlk məlumatlara görə, 11 nəfərin öldüyü, 6 nəfərin isə xəstəxanaya yerləşdirildiyi bildirilmişdi. Lakin Kun.uz hüquq-mühafizə orqanlarındakı mənbələrə istinadən xəbər verir ki, qəza nəticəsində ölənlərin sayı 13-ə yüksəlib.

Rayon rəhbərliyi həlak olanların şəxsiyyətinin müəyyənləşdirilməsi, onların ailələrinə maddi, tibbi və psixoloji yardım göstərilməsi, eləcə də dəfn mərasimlərinin təşkili ilə bağlı aidiyyəti qurumlara tapşırıqlar verib.

Bundan əlavə, yol-nəqliyyat infrastrukturunun inventarlaşdırılması, xarici təcrübənin öyrənilməsi və gələcəkdə belə faciələrin qarşısını almaq üçün yükdaşıma qaydalarına yenidən baxılması da gündəmdədir.

Hadisənin dəqiq səbəbləri hələlik açıqlanmayıb. Faktla bağlı araşdırmalar davam edir.