Fransada hökumətin dağılmasından sonra Makron yeni baş nazir axtarır

Fransa prezidenti Emmanuel Macron, baş nazir Fransua Bayrunun istefasından sonra ölkədə siyasi böhrana son qoyacaq yeni baş nazir axtarışındadır. Bayrunun vəzifədən getməsi onun büdcə sərtləşdirmə planlarının müxalifət partiyalarının kəskin müqaviməti ilə qarşılaşmasından sonra baş verib.

Ajans.az Reuters-ə istinadən xəbər verir ki, bazar ertəsi günü keçirilən etimad səsverməsində 364-194 səslə məğlub olduqdan sonra, çərşənbə axşamı istefasını rəsmi olaraq Prezident Makrona təqdim edəcək. Bu, Makronun 2017-ci ildən bəri prezidentlik dövründə iki ildən az müddətdə beşinci baş nazirin dəyişdirilməsi deməkdir.

Yeni baş nazirin qarşısında duran vəzifələr isə kifayət qədər çətindir: parlamentdə parçalanmış qüvvələri birləşdirmək, eləcə də 2026-cı il büdcəsinin qəbulunu təmin etmək. Ekspertlər bunun “az qala qeyri-mümkün missiya” olduğunu bildirirlər.

Namizədlər arasında Müdafiə naziri Sebastien Lecornunun adı hallanır. Digər mümkün namizədlər arasında sol-mərkəzçi siyasətçilər və texnokratlar da var. Lakin Fransa konstitusiyası prezidentin baş naziri kim və nə vaxt təyin edəcəyi ilə bağlı heç bir müddət və qayda müəyyən etmir.

Sosialist Partiyası hökumət rəhbərliyinə öz namizədini irəli sürmək niyyətindədir. Partiyanın lideri Olivier Faure, France Inter radiosuna açıqlamasında bildirib:

"Mən istəyərdim ki, bu vəzifəyə sol və ya yaşıllar gələcək. Biz artıq güc tələb etməliyik".

Bu arada ifrat sağçı Milli Ralli partiyası növbədənkənar parlament və ya prezident seçkiləri çağırışını yenidən gündəmə gətirib. Prezident Makron isə bu tələbləri hələlik rədd edib. Keçən il keçirilmiş növbədənkənar parlament seçkiləri parlamentdəki parçalanmanı daha da dərinləşdirmişdi.

Maliyyə bazarları hökumətin istefasına nisbətən sakit reaksiya verib. Analitiklərin fikrincə, Bayrunun devrilməsi artıq iqtisadi proqnozlara daxil edilib. Gözlər indi beynəlxalq reytinq agentliyi Fitch-in cümə günü açıqlayacağı Fransanın suveren reytinqinə dair qərarına yönəlib.

Ölkədə siyasi gərginliklə yanaşı, çərşənbə günü genişmiqyaslı hökumət əleyhinə etiraz aksiyaları da gözlənilir. “Hər şeyi bloklayaq” şüarı ilə çağırılan etirazlar əsasən sosial media vasitəsilə təşkil olunur və mərkəzləşdirilmiş liderlik olmadığından, onların miqyasını əvvəlcədən müəyyənləşdirmək çətindir.

Klermon-Ferrand şəhərində keçirilən "vida içkisi" tədbirində iştirak edən 61 yaşlı etirazçı Alain Petit deyib:

“Baş nazirin istefası artıq həll olunmuş məsələdir. İndi daha yuxarı vəzifələrə toxunmaq lazımdır. Bu, Makrona göndərilən mesajdır.”

Oxşar tədbirlər ölkə daxilində bələdiyyə binaları qarşısında da keçirilib və iştirakçılar çərşənbə günü daha geniş etirazlara hazırlaşdıqlarını bildiriblər.