Helikopter qəzası: Üç ölü, bir yaralı -Bu ölkədə

Böyük Britaniyanın Uayt adasında uçuş dərsi zamanı helikopterin qəzaya uğraması nəticəsində üç nəfər həyatını itirib, bir nəfər isə ağır vəziyyətdə xəstəxanaya yerləşdirilib.

Ajans.az CNN-ə istinadən xəbər verir ki, qəza bazar ertəsi səhər saatlarında baş verib. Northumsbria Helicopters şirkəti bildirib ki, G-OCLV modeli olan helikopter Sandaun hava limanından dörd nəfərlə havaya qalxıb və təxminən 24 dəqiqə sonra Şanklin bölgəsində tarlaya düşüb.

Hadisə yerinə təcili yardım və xilasetmə xidmətləri cəlb olunub, əraziyə giriş məhdudlaşdırılıb. Britaniya mediasının havadan çəkdiyi görüntülərdə helikopterin gövdəsinin ciddi zədələndiyi görünür.

Böyük Britaniyanın Hava Qəzalarının Təhqiqat Bölməsi səbəbləri araşdırmaq üçün müstəntiqlər göndərib. Şirkət istintaqa tam əməkdaşlıq etdiyini açıqlayıb.

Uayt adasının parlament üzvü Co Robertson hadisəni “bütün ictimaiyyəti sarsıdan faciə” adlandırıb və həlak olanların ailələrinə başsağlığı verib.