Alimlər “mükəmməl” şokoladın sirrini açdılar

Elm adamları şokoladın ləzzətini müəyyən edən əsas amilin kakao paxlalarının genetikası deyil, fermentasiya prosesində iştirak edən mikroblar olduğunu açıqlayıblar.

Ajans.az Nature Microbiology jurnalına istiandən xəbər verir ki, Nottingem Universitetinin bioelmlər məktəbindən Dr. David Qopaulçan bildirib ki, araşdırma şokoladın “ardıcıl keyfiyyət və ləzzət profili” ilə istehsalına imkan verəcək.

Onun sözlərinə görə, kakao paxlaları yığıldıqdan sonra beş-yeddi gün ərzində mayalanmaya buraxılır və bu proses mikroorqanizmlərin iştirakı ilə həyata keçir. Tədqiqat zamanı Kolumbiyanın Santander, Huila və Antioquia bölgələrindəki şokolad fermalarında müxtəlif mikroblar və onların paxlalarda yaratdığı kimyəvi dəyişikliklər analiz edilib.

Nəticədə məlum olub ki, mikrobların tərkibi bölgədən-bölgəyə fərqləndiyi üçün şokoladın dadında da ciddi fərqlər yaranır. Daha sonra alimlər bu mikrobları laboratoriya şəraitində təcrid edərək kakao paxlalarına əlavə edib fermentasiya prosesini təkrar ediblər. Nəticədə əldə edilən şokoladın dadı təbii şəraitdəki ilə üst-üstə düşüb.

Dr. Qopaulçan qeyd edib ki, bu kəşf şokolad sənayesi üçün inqilabi ola bilər: “Hazırda sənayenin fermentasiya üzərində nəzarəti yoxdur. Bu araşdırma şirkətlərə özlərinə məxsus, hər dəfə eyni keyfiyyət və dad profili olan şokolad istehsal etmək imkanı yaradır.”

Mütəxəssislər hesab edirlər ki, gələcəkdə mikroblara nəzarət etməklə fərdi “mükəmməl şokolad dadı” yaratmaq mümkün olacaq.