17 nəfərin ölümündən sonra peyvənd kampaniyasına start verib- Bu ölkədə...

İndoneziyada qızılca epidemiyası ilə mübarizə məqsədilə kütləvi peyvənd kampaniyasına başlanılıb. Bazar ertəsi yüzlərlə uşaq pulsuz peyvənd olunmaq üçün növbəyə düzülüb.

Ajans.az Associated Press-ə istinadən xəbər verir ki, Şərqi Yava əyalətinin Sumenep rayonunda son səkkiz ayda 2000-dən çox uşaq qızılcaya yoluxub. Ölən 17 nəfərdən 16-sı peyvənd olunmayıb, biri isə peyvənd kursunu tamamlamayıb.

İndoneziya daha əvvəl də peyvənd əhatəsindəki boşluqlar səbəbindən oxşar epidemiya ilə üzləşib. 2018-ci ildə Papua əyalətində qızılca onlarla insanın həyatına son qoymuşdu. Həmin dövrdə peyvəndlərin tərkibi ilə bağlı halal mübahisələri də ölkədə geniş müzakirələrə səbəb olmuşdu.

Rəsmi statistikalara əsasən, ölkədə 5 yaşadək 22 milyon uşağın yalnız 72%-i qızılcaya qarşı peyvənd olunub, bəzi bölgələrdə isə bu göstərici 50%-dən də aşağıdır. Hakimiyyət orqanları əhalini, icma və dini liderləri immunizasiya kampaniyasına dəstək verməyə çağırıb.

Sumenepdə keçirilən kütləvi peyvənd aksiyası 9 aylıqdan 6 yaşadək 78 min uşağı əhatə edir. Rayon rəhbərliyinin sözlərinə görə, peyvənd əks halda xəstəliyin daha geniş yayılmasının qarşısını almağın yeganə yoludur.

Ümumdünya Səhiyyə Təşkilatının məlumatına görə, ötən il 60 ölkədə genişmiqyaslı qızılca epidemiyası qeydə alınıb. Mütəxəssislər bildirirlər ki, epidemiya riskini minimuma endirmək üçün peyvənd əhatəsi 95%-ə çatmalıdır.