Vikipediya məhkəmə iddiasında uduzub

Vikipediya, könüllü redaktorlarının insan hüquqları və təhlükəsizliyinə təhdid yarada biləcəyini iddia etdiyi yeni Onlayn Təhlükəsizlik Aktı qaydalarına qarşı açdığı məhkəmə prosesində məğlub olub.

Ajans.az BBC-ə istinadən xəbər verir ki,Onlayn ensiklopediyanı dəstəkləyən Wikimedia Fondu, məhkəmədən qaydaların yenidən nəzərdən keçirilməsini tələb etmişdi. Söhbət, Vikipediyanın istifadəçilərinin şəxsiyyətini yoxlamasını tələb edə biləcək “1-ci kateqoriya” təsnifatından gedir. Bu status ən sərt onlayn təhlükəsizlik tələblərini nəzərdə tutur.

Fond iddia edib ki, qaydalar məntiqi cəhətdən qüsurlu və həddindən artıq genişdir, böyük sosial media şirkətləri üçün nəzərdə tutulduğu halda, Vikipediyaya da tətbiq olunacaq. Əgər sayt “1-ci kateqoriya” kimi təsnif edilsə, istifadəçilərin şəxsiyyətinin yoxlanılması tələb oluna bilər ki, bu da onların məxfiliyinə və təhlükəsizliyinə zərər verəcək.

Hökumət isə bildirir ki, Vikipediyanın tənzimləmələrdən azad olunması məsələsi nəzərdən keçirilsə də, bu fikir əsaslı səbəblərlə rədd edilib. Ali Məhkəmənin qərarı hökumət tərəfindən alqışlanıb və aktın icrası istiqamətində işlərin davam etdiriləcəyi vurğulanıb.

Wikimedia Fondunun baş müşaviri Phil Bradley-Schmieg qeyd edib ki, məhkəmə qərarı Ofcom və dövlət katibinə Vikipediyanın fəaliyyətinə “əhəmiyyətli maneələr” törədəcək bir rejim tətbiqi üçün yaşıl işıq yandırmayıb. Eyni zamanda, gələcəkdə bu məsələ üzrə əlavə hüquqi mübahisələrin mümkün olduğu bildirilib.

Ofcom isə açıqlamasında məhkəmə qərarını qeyd etdiyini və “1-ci kateqoriya”ya daxil ediləcək xidmətlərə dair işlərin davam etdiriləcəyini bildirib.