İsrailin hücumu: 16 fələstinli öldü

İsrail ordusunun Qəzza Zolağında köçkünlərin sığındığı çadır və evlərə endirdiyi hücumlarda, aralarında qadın və uşaqların da olduğu 16 fələstinli həlak olub, onlarla insan yaralanıb.

Ajans.az xarici mənbəyə istinadən xəbər verir ki,  İsrail ordusu səhər tezdən Qəzzanın cənubunda yerləşən Xan Yunis bölgəsində hücumlar həyata keçirib və köçkünlərin sığındığı çadırlar və bir evi hədəfə alıb.

Bir çox mülkinin yaşadığı evə edilən hücum nəticəsində azı 5 nəfər ölüb, 10 nəfər yaralanıb. Bildirilir ki, bəzi insanlar hələ də evin dağıntıları altında qalıb.

Xan Yunisin qərbində İsrailin pilotsuz uçan aparatla (PUA) çadırlara etdiyi hücumda bir qadın və bir uşaq həlak olub, azı 9 nəfər yaralanıb.

İsrailin Qəzza Zolağının cənubundakı əl-Mevasi bölgəsində köçkünlərin sığındığı çadırlara etdiyi hücumlar nəticəsində də 5 nəfər ölüb, 15 nəfər yaralanıb.

Qəzza Zolağının şimalında yerləşən Cibaliya bölgəsində isə İsrailin bir evi bombalaması nəticəsində 4 nəfərin həyatını itirdiyi və çox sayda insanın yaralandığı bildirilir.

İsrail ordusu Qəzza Zolağının bir çox bölgəsini həm hava, həm də quru hücumları ilə hədəfə almağa davam edir.