Nümayəndələr Palatası Trampın planını qəbul etdi

ABŞ Nümayəndələr Palatası ictimai yayım və xarici yardımlar üçün milyardlarla dolların kəsilməsini nəzərdə tutan Tramp planını qəbul etdi.

Ajans.az euronews-a istinadən xəbər verir ki, ABŞ Nümayəndələr Palatası cümə günü Prezident Donald Trampın ictimai yayım və xarici yardımlar üçün əvvəlcədən təsdiqlənmiş təxminən 9 milyard dollar (təxminən 7,7 milyard avro) vəsaitin ixtisarını nəzərdə tutan planını yekun olaraq təsdiqləyib. Qanun layihəsi 216 lehinə, 213 əleyhinə səslə qəbul olunub və indi Trampın imzası üçün Ağ Evə göndəriləcək.

Səsvermə bir neçə saat gecikib. Demokratlar cinsi cinayətlərdə ittiham olunmuş və həbsxanada vəfat etmiş Cefri Epsteynlə bağlı sənədlərin açıqlanması üçün səsvermə tələb ediblər. Buna baxmayaraq, qanun layihəsi sonda qəbul edilib.

Bəzi respublikaçılar planı dəstəkləməsələr də, Trampın federal xərcləri kəskin şəkildə azaltmaq planına mane olmamaq üçün lehinə səs veriblər.

Bu addım, respublikaçıların öz gündəmlərinə uyğun olmayan və ya şişirdilmiş hesab etdikləri institutları hədəfə almaq cəhdinin bir hissəsidir.