BMT: Kipr danışıqlarında irəliləyiş var

BMT başçısı Kipr danışıqlarında irəliləyiş olduğunu bildirib.

Ajans.az Tass-a istinadən xəbər verir ki, BMT Baş Katibi Antonio Quterreş Kipr sülh danışıqlarında irəliləyiş əldə olunduğunu və ada üzərindəki yunan və türk icmalarının liderləri arasında bir sıra təşəbbüslər üzrə razılaşmalar olduğunu bildirib.

Cümə axşamı Nyu-Yorkdakı BMT baş qərargahında Kipr mövzusunda keçirilən dördüncü genişləndirilmiş formatlı görüşdən sonra o qeyd edib:
“Bugünkü müzakirələr konstruktiv keçdi. Hər iki lider mart ayında razılaşdırdıqları altı etimad yaratma təşəbbüsü üzrə irəliləyişi nəzərdən keçirdi.”

Baş Katibin sözlərinə görə, altı təşəbbüsdən dördü artıq həyata keçirilib: gənclər üzrə texniki komitənin yaradılması, ətraf mühit və iqlim dəyişikliyi təşəbbüsləri, qəbiristanlıqların bərpası və mina təmizlənməsi üzrə razılaşma.

“Qalan iki təşəbbüs üzərində müzakirələr davam edəcək” — deyə Quterreş qeyd edib. Bu, adanın bölünmüş hissəsində dörd keçid məntəqəsinin açılması və tampon zonada günəş enerjisi ilə bağlıdır.

Bundan əlavə, liderlər yeni təşəbbüslər üzrə ortaq anlayışa gəliblər. Bunlara vətəndaş cəmiyyətinin iştirakı üçün məsləhət orqanının yaradılması, mədəni irs mübadiləsi, hava keyfiyyətinin monitorinqinin yaxşılaşdırılması və mikroplastik çirklənmə ilə mübarizə daxildir.

“Bu təşəbbüslərin hamısının mümkün qədər tez həyata keçirilməsi bütün kiprlilərin xeyrinədir” — deyə Quterreş vurğulayıb.

“Önümüzdə uzun bir yol var və gələcəyin kiprlilər üçün nə demək ola biləcəyini düşünmək vacibdir” — o əlavə edib.

“Ancaq bu addımlar gələcəkdə dialoqun davam etdirilməsi və bütün kiprlilərin xeyrinə olan təşəbbüslər üzərində işləmək öhdəliyini aydın şəkildə göstərir” — deyə BMT Baş Katibi bildirib.