Qəzzada yardım növbəsində faciə

Qəzzada Yardım Paylanmasında İzdiham: 20 Nəfər Həlak Oldu

Ajans.az bbc.com-a istinadən xəbər verir ki, ABŞ və İsrailin dəstəklədiyi Qəzza Humanitar Fondu (GHF) bildirib ki, Qəzzanın cənubunda yerləşən yardım paylama mərkəzlərindən birində baş verən “faciəvi hadisə” nəticəsində 20 nəfər həlak olub.

Bəyanatda qeyd olunur ki, on doqquz nəfər tapdanaraq, bir nəfər isə “xaotik və təhlükəli izdiham zamanı” bıçaqlanaraq həyatını itirib. Fondda hesab edirlər ki, bu izdihama səbəb “HƏMAS-a bağlı olan və izdiham içində təxribat törədən şəxslər” olub.

Bu məlumatın müstəqil qaynaqlarla təsdiqlənməsi hələ mümkün olmayıb.

Lakin, daha əvvəl Xan Yunis bölgəsindəki Nasser Xəstəxanasının rəsmiləri bildirmişdilər ki, GHF-yə bağlı özəl təhlükəsizlik əməkdaşlarının yardım məntəqəsini bağlamasından sonra “boğulma” səbəbindən 10-dan çox insan həlak olub, digərləri isə xəsarət alıb.